Wałtoru 27. februara jo se w českem senaśe w Praze wótměło zjawne słyšanje, pósćone serbskim nastupnosćam.
Słyšanje jo pśigótował wuběrk za kubłanje, wědomnosć, cłowjeske pšawa a peticije a stawna komisija senata za krajany we wukraju (Česki stat dawa łužyskim Serbam status krajanow, lěcrownož njejsu Čechy). Teke towaristwo pśijaśelow Łužyce jo pśipomagało. Senator Jaromír Jermář, znaty pśijaśel Serbow, jo słyšanje nawjedował a jo měł tu głownu zasłužbu na tom, až jo se to zarědowanje wótměło. Wobźělili su se dalšne senatory, jaden eurowótpósłany, generalny konsul Českeje republiki w Sakskej, zastupniki ministarstwow za kubłanje, wukraj a góspodarstwo. Słyšanje jo było zjawne, togodla jo teke kopica dalšnych zajmcow za Łužycu a serbske nastupnosći była pódla. Wobźělenje wótpokazał jo zastupnik koncerna EPH.
W prědnem źělu su serbske zastupniki Domowiny (mj. dr. pśedsedaŕ David Statnik a Beata Bězanowa, wjednica RCW) źěło Domowiny a kubłańsku situaciju pla Serbow pśedstajili.