We slědnym wudaśu Nowego Casnika (na 7. boce) smy wótśišćali stare foto wót zapusta. Smy kśěli wěźeś: póznajośo tu wjas? Jo ten wótmólowany zapust wopšawźe był w lěśe 1955?

Jadna lazowarka jo zazwóniła do redakcije. To jo była Šołśic śota (Christl Barukowa). Wóna jo hyšći wjele wěźeła, to njej źiw, wšak jo se wobźěliła 6 abo 7 razow na zapusće. Jo na pśikład groniła, až pśeśěgi njejsu byli take wjelike ako źinsa, a jubilejne zapusty tek njejsu znali. Za to ale su dwa dnja dłujko swěśili, a kužde lěto we drugej kjarcmje. Rozmjej: pjerwjej su měli we tej jsy dwě kjarcmje. Jadna jo była Konopcyc kjarcma, ta hyšći źinsa stoj. Druga jo była Šenkaric kjarcma, na drugem boku kśicnišća k Brjazynje. Na tej wjažy a tych woknach jo hyšći wiźeś, až tam jo něga zal był.