Z cerwjeneju barwu su na kórśe historiske chmjelojske grunty wóznamjenjone. Ako su wjas do Chóśebuza we lěśe 1950 pśibili, su te granice nejpjerwjej dalej wobstali. Źinsa pak wopśimjejo měsćański źěl Chmjelow wjele wěcej (glej carne linije). Měsćanarjam njejo ten problem wědobny, a stakim pśeměnja to słowo „Chmjelow“ pómałkem swój wóznam (Bedeutung). To se Starym Chmjelowarjam njespódoba. 
Ze Starego Chmjelowa/Alt-Schmellwitz. Někotarym wobydlarjam Starego Chmjelowa se tudy njespódoba, až źinsajšne granice togo měsćańskego źěla se zewšym njemakaju z historiskimi granicami něgajšneje jsy Chmjelow. Spomnjeśe na to, co zapšawym k Chmjelowu słuša a co nic, pada dlej a wěcej do zabyśa. Tu starosć jo nam gano wupowědał Frank Schreiber, wobsednikaŕ tudskeje firmy za topjenje a sanitarnu techniku. Wón jo ekstra dla teje wěcy zwónił na redakciju. [K dopomnjeśu: Stary Chmjelow jo wót lěta 1950 do města pśibity].
sobota, 18.05.2024
