Z Turjeja/Tauer. Turjańska gmejna buźo se wobźěliś na akciji Serbska rěc jo žywa. To jo na woklapnicy pětk srjejź januara w kjarcmje „Pśi gaśe“ k wěsći dała šołtowka Katrin Kalawcyna. Gromaźe z Domowinskeju kupku budu wóni wšykne serbske aktiwity we jsy we jadnej mapje dokumentěrowaś a wopisaś. „Mamy naźeju, až nam buźo teke raz myto pśipadnuś“, jo šołtowka groniła.

We jsy woplěwaju serbske nałogi a swěźenje, teke w źiśowni. Rownož doněnta njejo se tam raźiło Witaj-projekt zawjasć, ga weto pśiźo raz we tyźenju jadna młoda wótkubłarka, ak wucy źiśi serbske słowa a spiwanja – jo Kalawcyna wulicowała a chwaliła tu iniciatiwu.

Ekstra za lětosnu akciju ma šołtowka to wótglědanje, serbske stronine mjenja pśed zabyśim wuchowaś. Tu ideju su sebje wótglědali wót Drjenowa – tam jo Šula za dolnoserbsku rěc a kulturu pśewjadła łoni pśednosk wót stroninych mjenjow. Drjenojske wobydlarje su se tegdy rozgranjali, až mógli snaź na wšakich městach toflicki stajiś ze serbskimi mjenjami stronow abo źělow jsy ako Budyń abo Góra. To budu teke turjańske wopytaś.