Pópšawem mamy my cłonki chora Łužyca pónjeźele wjacor kšuty termin w „Serbskem domje“ w Chóśebuzu – tam ga jo pśecej ta proba. Ale to jadno pónjeźele pśed tśimi tyźenjami smy se wuwześnje zmakali w „Serbskem dwórje“ w Dešnje, a na našu woklapnicu.

Wugódnośili smy pśi dobrej jězy a piśach tšojenja zachadnego lěta 2017, kenž jo był kradu wósebny za chor: swěśili smy 25-lětne wobstaśe našogo chora a smy měli wjele (14!) a kradu wósebne koncerty. Na cerk-winyma dnjoma w Barlinju a Tšupcu jo naš chor spiwał, wustupili smy tek w Górnej Łužycy a tej dwa mjaztym tradicionelnej koncerta na śichy pětk a na 1. adwent w Dešnje stej pśecej wjěraška našogo chorowego lěta. A nic naslědku smy my ako lajske spiwarje łoni směli spiwaś z profijami Serbskego ludowego ansambla na jadnom koncerśe we Wušej cerkwi w Chóśebuzu. Za wšyknu procu pśi wuměłskem a organizatoriskem nawjedowanju chora smy se našyma wjednicoma Lubinje Žurec-Pukačowej a Milenje Stockowej wutšobnje wuźěkowali.