Spěchowańske towaristwo za Serbski muzej Chóśebuz z.t. jo se załožyło pśed styri lětami. Wóno co k tomu pśipomogaś, wědu wó serbskich stawiznach a serbskej kulturje w regionje rozšyriś a pśedewšym pśez swójo statkowanje Serbskemu muzeju pśi wšakich nadawkach a projektach pśi boce stojaś.Wóno jo sebje pśedewzeło, kužde lěto jadno swójske zarědowanje pśewjasć, a to pó móžnosći w serbskej rěcy. Wjeraška našogo statkowanja w slědnych lětach stej tak byłej sympozium na cesć stawiznarja a archiwara dr. Frida Mětška a sympozium na cesć dolnoserbskego kantora, ceptarja, ludowego wulicowarja a Maśicarja Hanza Hühnchena. Smy pak teke wustajeńce sobu pódpěrowali a pomogali pśi nakupje wuměłskich twórbow. How by se mógałej mjenowaś wobraz „Pśězarce w Błotach“ a wobrazowy cyklus SATKULA.