We bórkojskej „Domowniskej śpě“ pśigótuju tuchylu wustajeńcu wó Minje Witkojc. Ta serbska redaktorka a basnikarka ga jo se 28. maja pśed 125 lětami naroźiła. Za to kśě wšake tofle wó jeje žywjenju a statkowanju wugótowaś. Pśi tej góźbje jo se do zjawnosći spórało, až wěcej listow a druge zawóstanki Witkojc‘ dajo, ako doněnta jo znate było. Wšake dokumenty ga laže we Serbskem kulturnem archiwje w Budyšynje a we Literarnem archiwje w Praze. Dalšne wěcy pak stej namakałej Edelmannojc manźelskej z Awstriskeje. Wónej ga stej derbnułej ten dom we Českej, źož Anna Teplá (sotša Miny Witkojc), jeje cłowjek Karl Teplý a źowka Erika su žywe byli. Ten dom stoj njedaloko nimskeje granice pla Varnsdorfa. We tych stronach jo pó wójnje radna licba Serbow žywa była.