Zwěstk „Strukturwandel jetzt – kein Nochten II“ jo se załožył w měrcu 2013 w Rownem. K załožarjam słušaju pótrjefjone wobydlarje, wšake wobswětowe zwěstki a dwě partaji: Lěwica a Zwěstk 90/Zelene. Wóni su kóńc oktobera wózjawili stojnišćo k brunicowemu planoju za Wochožańsku jamu (Tagebau Nochten). Andreas Kirschke jo se rozgranjał dla togo z powědarjom zwěstka Adrianom Rinnertom.

Nowy Casnik: LEAG ma wót 30. měrca nowy koncept za rewěr. Wóni wótstupiju wót wótbagrowanja Trjebina, źěla Slěpego, Rownego a Mułkojc. Kak sćo tencas na tu powěsć reagěrowali?

Adrian Rinnert: Na jaden part z wjelikim wólažćenim a wjaselim, na drugi pak cwiblujucy. Pśeto brunicowy plan za Wochožańsku jamu wobstoj dalej. Wóno njedajo žednu juristisku wěstosć, a teke žedno zlubjenje politiki, až te jsy naslědku wóstanu a se žednje njewótbagruju. Togodla musy brunicowy plan něnto se kradu pśeźěłaś a pórěźiś.

Zwěstk za regionalne planowanje Górna Łužyca–Dolna Šlazyńska jo wótwórił nowu planowańsku proceduru. A wy sćo ned swójo prědne stojnišćo (Stellungnahme) jim zjawili. Dla cog?