Slěpe/Schleife. Gmejnska rada jo zachopjeńk decembera wobzamknuła oficielne stojnišćo (Stellungnahme) k planoju za Wochožańsku jamu 2018/2019. We njom pomina Domowinska župa Jakub Lorenc-Zalěski wót koncerna LEAG, až pjerwjej nježlic budu slěpjańske grunty wótbagrowaś, deje se stronine mjenja na kórtach dokumentěrowaś a wobydlarjam gmejnow, Serbskemu institutoju a slěpjańskej Domowinje k dispoziciji stajiś.

Slěpjańska gmejna sama póžeda wót koncerna, až dej wuźěłaś koncept, kak budu gmejnu pśed zogolom a prochom woplěwaś. Doněnta taki koncept felujo a to, což jo se we tej nastupnosći cyniło, njedosega zewšym – pišu we stojnišću. LEAG dej se zukowych signalow w nocy ceło wobijaś. Teke bagery njedeje w nocy źěłaś. Gmejna měni, až něnto, źož se njedobywa telik wugla ako pjerwjej, jo nocny měr móžny.

Mjazy chromami a jamu dej wušej togo „zelena smuga“ stojaś. Rozmjej: Góla dej wóstaś, a tam, źož jo trjeba, deje nowe bomy nasajźaś. LEAG dej teke zwěrjeta a rostliny z drogotnych biotopow na druge se góźece města pśesajźiś, nježlic je skóńcuju.