Chóśebuz/Cottbus. Wukniki jadnasteje klase Dolnoserbskego gymnaziuma kśě se wopóznawaś z historiju, a to we rozgronje z casowymi znankami. Tema projekta zni „Serby za cas DDR“. Śěžyšća su wšakorake, mjazy drugim: kubłanje, Domowina, represije a tak dalej. Něnto pytaju serbske casowe znanki a pišu jim listy z pšosbu, aby jim wót swójogo kjabla a wót swójich nazgónjenjow w DDR-skem casu wulicowali. Južo wěcej razow su se w Centrumje za cłowjeske pšawa we něgajšnem chóśebuskem popajźeństwje zmakali. Projekt jo akle we zachopnej fazy. Co naslědku wen pśiźo, njejo jim hyšći wědobne, a teke forma prezentacije rezultatow njejo wěsta. Snaź budu wjerśeś film. Ale to jo wótwisne wót casowych znankow. Projekt jo se zachopił 1. septembra 2017 a dej warnowaś tśiběrtyl lěta. Kupka wót 10 wuknikow slěźi we lichem casu na pólu regionalneje historije. Na kóńcu projekta budu gótowe wuslědki (Ergebnisse) we krajnem sejmje pśi góźbje „historiskich wikow za młoźinu“ (Jugendgeschichtsmesse) 16. junija 2018. Něnto južo pśemysluju, kak mógu serbsku rěc pśi prezentaciji w Pódstupimje za-pśěgnuś.