Ze 90 cłonkami jo lisćina Domowinskich cłonkow na Górach bejnje dłujka. Pó kupkoma w Janšojcach a w Chóśebuzu jo wóna mjaztym ta tśeśa nejwětša kupka w cełej Dolnej Łužycy. A až njejo w tych 6 lětach, ako wóna akle wobstoj, nichten z teje kupki wustupił, to teke powěda za to, až se cłonkam w Domowinje spódoba, lěcrownož tak lažko njejo, wšych 90 cłonkow pśecej pód jaden kłobyk spóraś, tych młodšych rowno tak ako tych ze staršeje generacije.

Tak ako w młogich z tych něźi 40 kupkow w župje Dolna Łužyca su to głownje žeńske a młode źowća, ako pśisłušaju Górjańskej kupce. A to se teke pokažo w pśedsedarstwje. Dotychměst su to byli 4 žeńske (Jenifer Dünnbierowa ako pśedsedarka, Lysann Rybakojc, Adina Volgmannojc a Julia Jankojc) a jaden muski, ga Karsten Klose. Ten pak jo swój „amt“ w Domowinje pušćił, dokulaž ma wjele drugego na starosći. Na jogo městno co nejskerjej stupiś Ullrich Blaschke, cłonk gmejnskeje rady. Wón co pak nejpjerwjej tšochu wuzgóniś, co na jogo kuli pśiźo w Domowinskem pśedsedarstwje a pón se daś wuzwóliś do togo wažnego gremiuma.