Chóśebuz/Cottbus. Janšojski bog jo pśedslědny tyźeń pśišeł na woglědy do Měsćańskego muzeja. Rěcny centrum Witaj, Spěchowańske towaristwo za Serbski muzej a Domowina su gromaźe organizěrowali projektowe dny za wukniki tśeśich a stwórtych klasow zakładnych šulow, źož maju serbsku wucbu. Nagromadu su to byli pśisamem 170 źiśi ze swójimi ceptarkami, ako su na tśich dnjach pó rědu namakali drogu do muzeja – ze Žylowa, Janšojc, Picnja, Brjazyny, Bórkow, Tšupca, Luboraza, Libanojc, Zelezneje a Drjowka. A teke pěś měsćańskich šulow jo było zastupjonych: Kästnerowa, Nevogtowa, Hildebrandtowa, Fröbelowa a UNESCO-šula.