Dešno/Dissen. Koncern LEAG jo zlubił, až buźo dalej serbski lud w brunicowych stronach pśi zeźaržanju etniskeje a socialneje identity pódpěraś. Kooperaciske wujadnanje z Domowinu, kótarež jo wordowało 2007 wót Vattenfalla pódpisane, buźo teke we nowem lěśe 2018 zakład za zgromadne źěło LEAG a Domowiny. To su sebje gronili zastupniki Domowiny a koncerna LEAG na lětnem źěłowem rozgronje srjejź nowembera w dešańskem muzeju. We zgromadnem wujadnanju jo wustawjone, až LEAG buźo pódpěraś projekty k nałožowanju serbskeje rěcy a mócowanju serbskego žywjenja a kultury. Wósebnje kśě pódpěraś Serbski kulturny centrum w Slěpem. Dalej jo to grono wót dokumentaciskego a infromaciskego centruma w Nowem Rogowje a wót zeźaržanja serbskeje identity pśez zukowu a filmowu dokumentaciju.