W decembrje změjo kulturny casopis Rozhlad styri głowne temy. Jadna z nich su stawizny dolnoserbskich kśesćijanow w 20. stolěśu. W pókšacowanju pśinoska z nowemberskego Rozhlada wopisujo Hartmut Leipner jich procowanja, serbsku rěc zasej do cerkwinego žywjenja zapśěgnuś a wu-zwignjo organizěrowanje serbskich namšow, wudawanje duchowneje literatury a źěło Spěchowańskego towaristwa za serbsku rěc w cerkwi.
Kak jo se sorabistika wuwiła, to póstaja sobu Serbski institut, kótaryž jo 26. oktobra 25lětne wobstaśe wóswěśił. Rozhlad jo se z cłonkom pśirady instituta Rolandom Martijom rozgranjał. Lubina Malinkowa dokumentěrujo pśinosk wó sorabistice w 21. stolěśu, kótaryž jo dała do diskusiji na zmakanju młodych sorabist(k)ow w Budyšynje w juniju toś togo lěta. Pśinosk jo w górnoserbskej rěcy, Rozhlad pśiwzejo rad dalšne komentary a mysli. W górnoserbskej rěcy jo teke pśinosk Měrka Šołty. Wón jo se zaběrał z „Pěsničkami hornich a delnich Łužiskich Serbow“ a jo glědał za tym, chto jo mimo Jana Arnošta Smolera se wobźělił na zběranju spiwow a zestajanju knigłow.