Skóro 60 lět źěłaju dialektologi ze wšyknych słowjańskich krajow na tom, aby wudali pśirownujucy dialektny atlas, kótaryž by ceły sedleński rum słowjańskich ludow wót Baltiskego až pó Egejske mórjo na jadnaku wizu wopśimjeł – Słowjański rěcny atlas. Južo we 1960tych lětach jo něźi 830 městnosćow wordowało wuzwólonych, źož su tamnych wobydlari wupšašowali. Wóni su dejali wšuźi na 3500 pšašanjow napšašnika wótegroniś. Toś te materialije deje se kartografěrowaś a na kóńcu wózjawiś, což jo wjelike organizatoriske wugbanje, na kótaremž su wobźělone 13 narodnych wědomnostnych akademijow a Serbski institut. Doněnta jo se wózjawiło južo cełkownje 16 zwězkow Słowjańskego rěcnego atlasa (glědaj www.slavatlas.org). Ze serbskego rěcnego teritoriuma su w atlasu reprezentěrowane styri městnosći: Dešno, Hory, Brězowka a Radwor. Tam zezběrane daty su za pśedstajenje wšakorakosći słowjańskich dialektow wjelgin wažne. 7. zwězk atlasa wó słownistwje z wobcerkow „Drastwa a crjeje, hygiena a medicina“ nastanjo w Serbskem instituśe w Budyšynje.