Slěpe/Schleife. Iniciatiwa za demokratiski legitiměrowane zastupnistwo serbskego luda Serbski sejm ma nadalej twarde wótglědanje, až južo 2018 dej se wuzwólowanje prědnego serbskego parlamenta pśewjasć. To su stwórtk pśed dwěma tyźenjoma wobwěsćili zastupniki iniciatiwy a Rady starostow pśi góźbje casnikarskego rozgrona w Serbskem kulturnem centrumje: powědaŕ iniciatiwy dr. Měrćin Wałda z Njeswačidła (Neschwitz), dalšne cłonki dr. Andreas Kluge z Drježdźan, Alexander Pólk z Budyšyna a Edith Pjeńkowa z Rownego kaž teke dwa starosće z Dolneje Łužyce dr. Hartmut Leipner ze Žylowka a Martin Cernja z Gogolowa. Wóni su zjawnosći prědkstajili swój 7-punktowy plan na droze k serbskemu sejmoju.