W susednem pólskem wojwodstwje Lubuske (to su strony wokoło Zeleneje Góry) maju cełu kopicu wětšych muzejow. Pó terenje, pó wjelikosći jo ten w Ochli, jadnej jsy blisko Zeleneje Góry, ten nejwětšy. Jo to etnografiski muzeum, w kótaremž jo pśedstajona na 13 hektarach wósrjejź góle wejsna ludowa architektura, a to głownje z originalnymi starymi, za wětšy źěl drjewjanymi chromami, groźami, brožnjami a dalšnymi twarjenjami, gromaźe ze starym, burskim a rucnikarskim rědom a drugimi, historiskimi eksponatami, we jadnom samo ze wšakimi serbskimi. Pśed 40 lětami su ten muzej załožyli. Mjaztym maju tam južo wokoło 80 wšakich objektow. Wše te twarjenja su raz stojali we wokolnych regionach, buchu tam wóttergane a how zasej natwarjone a wugótowane za woglědarjow. Mjazy nimi su teke žedne „łužyske“. Dogromady wokoło 50.000 luźi kužde lěto do togo wjelgin zajmnego muzeja woglědajo, mjazy nimi w radnej licbje šulske źiśi. 25 žeńskich a muskich, se stara za to, až wóstanjo w muzeju wšykno w nejlěpšem rěchu.