Chóśebuz/Cottbus. Krotko pó jubilejnem zmakanju Dolnoserbskego gymnaziuma sobotu tyźeń (glej artikel dołojce) jo se wjacor zachopiła 34. Schadowanka. Njeglědajucy na njewobstawne a njegódne wjedro jo wjele luźi pśišło.
Organizator togo tšojenja jo Załožba za serbski lud w kooperaciji z Dolnoserbskim gymnaziumom. Nowe jo pak było lětosa, až za program jo zagronite było młode towaristwo „Studnja“, ak jo južo „powěsćowe cołnowanje“ w Błotach organizěrowało.
Robert Engler, pśedsedaŕ towaristwa, jo Casnikoju gronił, až jo wjelgin glucny dla rezultata togo dłujkego pśedźěła: „Pśigótowanja su trali někotare tyźenje, a wóno jo było młogi raz śěžko za toś ten kóńc tyźenja wuměłce skazaś – pśeto we tom casu jo se wjele tšojło. Ale cłonki našogo towaristwa su nazgónjone, a to jo nam wjelgin pomogło. Togodla smy wjelgin źěkowne za tu góźbu, až smy mógali taki diwersny program na nogi stajiś“.
Moderaciju stej pśewzełej absolwentce DSG Anna Zachariasojc (jo abituru 2016 měła) a Anna Krügerojc (2017). Zawjeźeński spiw jo měła band „Kula Bula“ na starosći.