Rubyn/Ruben. Južo w pśedslědnem Casniku smy rozpšawili wót rědnego swěźenja k 700. jubilejoju Rubyna wót 18. do 20. awgusta. Wjerašk jo był swěźeński pśeśěg sobotu z něźi 30 wobrazami. Z tak wjele wobźělnikami a teke pśiglědowarjami njejsu organisatory sami licyli. W Rubynje ga gótuju tak, až kuždy móžo pśiś, ako se jomu co, a njemusy se do togo pśipowěźeś. Wšak na wejsański part. Na kóńcu jo było tak wjele luźi, až jo było swěźenišćo skóro pśemałe. Weto su dostali wšykne dobru bursku jězu a piśe a su wjasołe swěśili. Wjacor pón su jěli hyšći raz jězu a piśa pśikupowat, dokulaž su južo tak wjele rozpśedali.

Dobry zachopjeńk jo był južo pětk prezentacija rubyńskeje chroniki, źož jo była stara šula połna luźi. Radochlic manźelskej, Anett Sischke ako pśedsedarka Domowinskeje kupki tak ako awtory a dalšne su pśedstajili te 236 bokow tłuste knigły z wjele zajmnymi a rědkimi starymi fotami.