Dešno/Dissen. Njeźelu tyźeń jo dešańska młoźina łapała kokota. Źaseśo rejtarje su ten raz sobu gótowali, mjazy nimi łoński žnjowny kral Maximilian Hasacki a superkral lěta 2012 Matthias Pannwitz. Wónej stej słušałej wót wšogo zachopjeńka k faworitam. Stej skobodnje a šykowanje rejtowałej pśisamem stojecy na kónjecem kśebjaśe. A dla tog, až wobej stej teke pšawje derje zrosćonej, stej južo jěsno z ruku tu kokotowu głowu pótłusnułej, młogi raz ju teke pśimjełej, wóna pak jo se jima pśecej zasej z ruki wusuwnuła. Wjednica dešańskeje młoźiny Charlotte Kuš-cyc (Kuschka) – jadna wót tych 11 źowćow w serbskej drastwje – jo se wubójała, až to łapanje změjo pśeliš malsny kóńc. A jo ned zawołała na pomoc Christiana Kwosa (Quos), togo młoźeńca we carnem fraku a z cylinderom na głowje, ako jo se starał wó powjesanje kokota a flašackow z paleńcom (wón jo dostojnje zastupował Svena Šerego (Scherry), ako wacej to źěło wugba).