Dešno/Dissen. Bóśony su měli tudy lětosa skerjej dobre lěto – jo nam gronił Dietmar Haufe z Hochoze, kótaryž dešańske bóśony licy a se angažěrujo we centrumje za naturu Naturkundezentrum Spreeaue e.V.

Wót tych sedymich pórow, ako su cełe lěśe w Dešnje pśebyli, su za powěsću Haufego styri póry sedali na jajach. Wósym bóśonkow jo dogromady se pla nich wukluwało a lěśe pśežywiło: jaden raz tśo, dwójcy dwa a jaden raz jaden. Jaden dalšny bóśonk jo se wukluwał, jo pak wordował wót starjejšeju z gnězda wustarkany a wuslěkł. To se stanjo pśecej, gaž bóśon a bóśonica njamóžotej wšykne młode doseśiś.

Weto naglěda Haufe to lěto ako dobre: To stej narowno dwa młodej bóśona na kuždy pór, ak jo młode měł. Wósym bóśonow to jo wjele wěcej łoni a pśed tśimi lětami su jano styrjo młode bóśonki w Dešnje lěśe pśežywili.