Chóśebuz/Cottbus. Smy gano pisali w Casniku, až jo měła Rada za nastupnosći Serbow wósebne wobradowanje dla wokrejsneje reformy. Slědny tyźeń su wózjawili k tomu informaciju, až su tu wěc něnto tak daloko wótwažowali, až maju k tomu měnjenje. To jo, až njesmějo nastaś špatnjejša situacija za Serbow ako doněnta.

Serbska rada ma wobmyslenja dla hyšci wětšych wokrejsow. Wuchada z togo, až budu Serby dla togo hyšći wěcej marginalizěrowane. Serbska rada wiźi pótrjebu za pólěpšenje nacerjenja za wokrejsnu reformu. Wósebnje to pšašanje zagronitych za serbske nastupnosći deje wobmysliś. „We tych wětšych wokrejsach njejo wěcej móžno, aby to źěło cesnoamtski wugbali“, su pisali we medijowej informaciji 28. julija. Gremije za gromaduzłoženje wokrejsow dejali zagronite za serbske nastupnosći wěcej zapśěgnuś, pomina dalej serbska rada. Wóni ga nejlěpjej wěźe, we kótarych dypkach su serbske nastupnosći nejwěcej pótrjefjone.