Skóńcnje jo tak daloko. Móžomy se něnto wjaseliś na to, což buźo se njeźelu, 9. julija, zeger 13.30 tšojś w Dešnje. Tam co se nowo załožone mustwo „Serbske koparje/Wendische Auswahl“ z Dolneje Łužyce prědny raz oficialnje publikumoju pśedstajiś. Graś buźo pśeśiwo drugemu serbskemu mustwoju, ga pśeśiwo „Serbskej wubrance“ z Górneje Łužyce. Ako mjaztym wěmy, njebuźo to prědne graśe mjazy dwěma serbskima mustwoma z Bramborskeje a Sakskeje. Mikławš Krawc z Budyšyna, kenž jo w pěśźasetych lětach był serbski ceptaŕ w Bórkowach, ga jo gano w Casniku pisał, až stej južo w lěśe 1950 takej mustwje pśeśiwo sebje grałej a to na wjelikem zmakanju Serbow w Budyšynje. W mustwje z Dolneje Łužyce su tegdy sobu grali balokoparje ze wšakich mustwow z mjenim „Traktor“. 3:1 su tegdy pśed 67 lětami dobyli te Górne Serby...