Chórosć njejo pópšawem nic dobrego, ale casy pśez chórosć teke něco pśinawuknjoš. Dokulaž som ceły junij była chóra pisana dla mójeje tśeśeje wócneje operacije a som tak skomuźiła tu cełu mań rědnych zarědowanjow w tom mjasecu, zachopjecy wót finisaže wustajeńce SATKULA Karla Vouka, źož jo našo Spěchowańske towaristwo za Serbski muzej Chóśebuz z.t. wažnu rolu grało, pśez wótwórjenje wustajeńce RCW w Serbskem domje, až do festiwala „Łužyca“, som se bejnje gniwała. ALE, folklorny festiwal na kóńcu pópšawem njejsom skomuźiła. Kak to? Som se njeźelu wótpołdnja zalogowała do livestreama, ako jo pórucył mdr Sakska, serbski rozgłos. Som pśipadnje w radiju słyšała, až taki livestream dajo – a ten běšo wjelicny! Som mógała wšykne kupki festiwala dožywiś, ako su se njeźelu wótpołdnja w Chrósćicach prezentěrowali. Pśi tom jo se mě wósebnje spódobała krotka introdukcija kuždeje kupki pśez specielny trailer, což jo mě dopomnjeło na Eurovisionski šlagerowy festiwal. To běšo wjelgin zglucone a informatiwne.