Dolnoserbske kśesćijany wóswěśiju lětosny Serbski cerkwiny źeń we Tšupcu 1. a 2. julija 2017 gromaźe z našymi sotšami a bratšami z Górneje a srjejźneje Łužyce. Z bibliskim motom z ewangeliuma swětego Jana „We zachopjeńku běšo to słowo“ kśě pokazaś na wósebnu rolu reformacije w Serbach: Pśez pśikład pśełožka biblije do nimskeje rěcy wót Mjertyna Luthera su se serbske duchowne culi wuskoboźone, aby pśestajili nabóžninske teksty a kjarliže do serbskeje rěcy.

W lěśe 1574 jo tšupcański serbski faraŕ a uniwersalny wucony Albinus Mollerus wudał Lutherowy katechizm a spiwarske ako prědne śišćane knigły w serbskej rěcy. To jo wažny póstark był za wuwiśe serbskeje pisneje rěcy. Spomnjeśe na Mollerusa se śěgnjo ako cerwjena nitka pśez ceły Serbski Cerkwiny źeń.

Zmakanje zachopijo se sobotu, 1. julija, zeger 14:00 z nabóžninu pla pomnika Mollerusa. Pótom buźo kafejpiśe w gósćeńcu „Zur Byttna“ w Tšupcu a z pśednoskami wó temje „Serby a reformacija“.