Janšojce/Jänschwalde. Gmejnska rada jo na swójom wobradowanju stwórtk wobzamknuła, až gmejna njebuźo wejsny konsum kupiś. To jo nam powěźeła wótpósłana Zelenych we bramborskem parlamenśe Heide Schinowsky, ako w Janšojcach bydli a se angažěrujo, aby loda we jsy wóstała.

Nježlic pak k tomu wobzamknjenju jo pśišło, jo nastała kontrowersna diskusija. Cłonki gmejnskeje rady su měli tšach, až gmejna buźo musaś lodu zasej pśedaś, pśiźo-li nuza a gmejna buźo musaś pó konceptu k wurownanju etata (Haushaltssicherung) źěłaś a wudanki rězaś – to se stanjo nejskerjej we lěśe 2018. Gmejnska rada ga jo kśěła zaprědka lodu kupiś, ale ministarstwo a Picański amt stej jim to kupjenje zakazałej, měnjecy až źaržanje lody njesłuša ku gmejnskim słušnosćam [płaśi-li koncept za wurownanje etata, ga smějo gmejna jano swóje obligatoriske słušnosći dopołniś].