Žyźine (Žydźino/Seidewinkel). Tśo muže nawjeduju wótněnta Zwěstk serbskich spiwarskich towaristwow: Pětr Cyž jo pśedsedaŕ, Gerald Schön jo zastupny pśedsedaŕ za Dolnu Łužycu a Janek Wowčer zastupny pśedsedaŕ za Górnu Łužycu. Jich su wuzwólili pětk tyźeń na głownej zgromaźinje zwěstka, źož jo se wobźěliło 24 zastupnikow chorow, kótarež k zwěstkoju słušaju. Schön stupijo stakim na město Jaroslava Pukača, Wowčer na město Leńki Thomasoweje – wónej wobej njejstej wěcej kandiděrowałej.
Mimo nich su do nowego pśedsedarstwa wuzwólone: Angelika Häneltowa (chor Meja), Melanie Bulankowa (chor Lipa), Sylvia Jancyna (Budyšyński chor), Susann Herrmannowa (Lubiński žeńskecy chor) a Cornelia Vahderowa (Janšojski žeńskecy chor).