W juliju togo lěta kśě we wokrejsnem sejmje w Baršću wobzamknuś plan za dalšne wuwiśe šulstwa we wokrejsu Sprjewja-Nysa, to groni w stronach wokoło Gubina, Chóśebuza, Baršća a Grodka. Dokulaž jo to za dlejšy cas, za lěta 2018-2022, myslone, buźo ten plan wjelgin wobšyrny a dłujki, z něźi 250 bokami!

Do togo plana buźo se wěsće teke zapisaś, až se w Gołkojcach załožyjo nowa šula – ga jadna cełkowna šula (Gesamtschule). To groni, až mógu na njej teke abitur gótowaś, jolic to kśě. Gmejna Gołkojce jo to naraźiła a za to jo mjazy drugim wušej 3800 luźi jadnu peticiju pódpisało.

Na pósejźenju wokrejsnego sejma 26. apryla stej frakciji CDU a Lěwice k tomu zapódałej wótpowědne wobzamknjenje, až ma se do nowego šulskego plana pśiwześ, až se taka nowa šula we wokrejsu SPN załožyjo. Pśisamem wšykne cłonki wokrejsnego parlamenta su za to zgłosowali. Šulski wuběrk buźo se dalej z tym zaběraś – mjazy drugim z tym, lěc buźo tam dosć wuknikow a chto tu šulu pśewzejo, wokrejs abo gmejna.

Bejna suma za muzeje