Domowniski muzej w Dešnje jo w Serbskem swěśe kradu znaty. Intresantne wustajeńce, pśednoski, wjeźenja a swěźenje su how kuždy mjasec dolabowaś. To se spódoba luźam: Wob lěto pśiźo how na 12.300 woglědari! Smy se wobrośili na Babette Zenkerowu a smy kśěli wěźeś, kak jo se jej raźiło, až wšo tak derje se bula. Wóna ga jo wjednica togo muzej, a to mjaztym 25 lět.

„Zachopili su druge“

„Ja som jano pówisk (Aushängeschild), ale na tom wuspěchu źěła wěcej luźi“, jo wulicowała. Na tom ma wóna zawěsće swój późěl. Zachopili ale su druge. Chrom, źož źinsa muzej jo, jo stara Dešańska šula była. We njej jo teke šulaŕ ze swójeju familiju bydlił. Na zachopjeńku 1980ych lět su dešańske źiśi do Brjazyna do šule chójźili, a chrom jo prozny był.

We tom casu jo Erika Jahnowa zachopiła, wšo móžno zběraś. Drastwine źěle, gjarnce a rolnikarski rěd jo dała do togo chroma, kótaraž jo něnto był Domowniska śpa. Z jeje zběrkow su mógali w lěśe 1983 prědnu śpu wugótowaś. Pómałem jo bywała wustajeńca wětša a wětša. W lětach 1993, 1997 a 2000 su powětšyli pśestrěń za prezentacije. Wósym jśpow tam něnt maju.