Kuždy dwójc: grajarje kusa „Sergej“ z lěta 2008 (wšykne wót hochoskego lajskego źiwadła) a wót noweje inscenacije, źož su wustupili profesionelne grajarje wót budyšynskego źiwadła. Wótlěwa: Jan Mikan, Werner Lehmann (wejsanaŕ Werner Gusor), Ana Zachariasojc, Silka Mjelišojc (jogo źowka Silka Gusorojc), Jurij Koch, Měrko Brankačk, Fryco Wojto (sowjetski wójak Sergej Iwanowič Gribojědow), Erhard Lotra, Torsten Schlosser (policist Erhard Lottra), Petra-Marija Wencelowa-Bulankec, Regina Lotrina (wejsanarka Regina Gusorowa). 
Kuždy jo wjelgin spokom spušćił 21. apryla hochoski kulturny centrum „Kólasko“: pśiglědarje rowno tak ako te profesionelne źiwadłowniki. Premjera graśa „Sergej“ jo se kradu derje raźiła. Samo te „originale“ – to groni te Hochozarje, kótarež su grali pśed źewjeś lětami ten kus wjelgin wuspěšnje – su nowu inscenaciju wjelgin wuchwalili.
Pśi tom jo Jurij Koch tegdy ten kus jim na kóžu pśirězał. Te charaktery su byli tak wopisane, až te lajske grajarje su musali pópšawem jano ten tekst wuknuś a howacej take byś, ako wóni teke howacej su. Erhard Lotra jo samo Erhard Lotra wóstał, ako policist „Erko“. Se wě, až jo režiser Kśećijan Bart weto wjele a kšuśe z nimi zwucował. Ale jich pśirodna wašnja jo był ten i-dypk cełego kusa.
Budyšyńske profije njejsu razka wopytali jich imitěrowaś. Su ten kus insceněrowali bźeze togo, až su sebje raz woglědali nagrawanje hochoskeje lajskeje kupki. To jo Casnikoju wulicował režiser Olaf Hais.
