Pódstupim/Potsdam. Nowy Casnik jo tegdy pisał, až jo Bramborski krajny sejm 5. apryla póstajił, až dej se nacerjenje (Entwurf) za šulske póstajenje k dobremu Serbow wobźěłaś.

Toś tu změnu su se Serby a jich sympatizanty wuwójowali. Kubłańske ministarstwo jo dostało wjele protestow Serbow, a to wót wšakich bokow. Tak jo teke towaristwo Ponašemu nazběrało pódpismow a jo napisało list. Pominali su, až žedna minimalna licba tam njestoj.

Nowy Casnik jo se pšašał Ministarstwa za kubłanje, młoźinu a sport (MBJS), kake reakcije a woboranja su se tam nazgromaźili. Zgónili smy, až su dostali

– 4 stojnišćow wót cłonkow AG „Serbske kubłanje“

– něźi 600 protestnych kórtkow

– 100 listow na MBJS

– něźi 340 pódpismow z mešta Wětošow

– lišćinu z pódpismami towaristwa Ponašemu.

Pla protestnych listow njejo MBJS znate cyniło wótpósłarjow dla šćita datow, su pisali.

Peticiju powědarki iniciatwy starjejšych Kathleen Komolcyneje jo mjaztym wušej 20.000 luźi pódpisało. Dostało jo MBJS teke wokoło hundert kreslankow serbskich źiśi.