Z Chóśebuza/Cottbus. Pśed 7 tyźenjami, 10. měrca, jo Domowinska župa Dolna Łužyca pśewjadła w Turjeju swóju głownu zgromaźinu. To nejwažnjejše teje zgromaźiny jo było to, wuzwóliś nowe pśedsedarstwo a nowego župana, dokulaž doněntejšny župan Harald Końcak wěcej nastupił njejo. Delegaty su toś wuzwólili nowe pśedsedarstwo ze 13 cłonkami, mjazy nimi 5, ako su prědny raz pśewzeli taku wažnu funkciju. Su to Marja Elikowska-Winklerowa, Gerald Schön, Frank Kosik, Klawdia Šewelisowa a William Janhoefer. Ten slědny jo dostał wót delegatow teke tu dowěru ako nowy župan.