Zagronita za nastupnosći Serbow w Bramborskej dr. Ulrike Gutheilowa jo we swójom gronje wuzwignuła, až Domowinje jo pśez Serbsku kazń w Bramborskej wažna rola pśiwdana. A kraj a Domowina źěłatej gromadu, mjazy drugim pśi wuwjeźenju krajnego plana k mócowanju serbskeje rěcy abo pśi wabjenju za serbske nastupnosći w serbskem sedleńskem rumje.

Gutheilowa jo pśilubiła, až hyšći pśed lěśojskimi ferijami dej prědna rozpšawa (Bericht) k situaciji serbskego luda w Bramborskej gótowa byś – do jeje pśigótowanja stej Domowina z Rěcnym centrumom Witaj zapśěgnjonej.

Wóna jo chwaliła tuchylny angažement serbskeje ciwilneje towarišnosći k lěpšemu serbskeje wucby. „To pokažo, až serbska wucba jo za was nastupnosć wu­tšoby a až wy ju naglědaśo ako trěbnu za dalejdawanje serbskeje rěcy pśiducym generacijam“. Wóna jo wugroniła naźeju, až naslědku se namakajo rozwězanje, kótarež njebuźo rewitalizěrowanju serbskeje rěcy zadoraś.