Chóśebuz/Cottbus. Jadnogłosnje jo měsćańska zgromaźina města Chóśebuz se za serbsku wucbu wugroniła. Na swójom pósejźenju 29. měrca su pó krotkej diskusiji wšykne wótpósłane głosowali za pśedłogu, kótaruž jo naraźił wušy šołta Holger Kelch. Doprědka su se južo wšake fachowe wuběrki za to wugronili.

Pśicyna wótgłosowanja jo plan kubłańskego ministarstwa (MBJS), až dej byś nowe póstajenje za serbsku a bilingualnu wucbu. Nacerjenje nowego póstajenja pak wopśimjejo wjele zešpatnjenja za serbsku wucbu. Měsćańska zgromaźina pomina wót MBJS, aby wzeli slědk te źěle póstajenja, kótarež su na škódu za serbsku a bilingualnu wucbu. Pokazuju mjazy drugim na pšawo na serbsku wucbu. Pśi tom dej byś ta pšawa měra pśecej ten nejwušy staw rěcy wuknika. „Žeden wuknik njesmějo se wóttšašyś wót serbskeje rěcy“, stoj we tom wobzamknjenju měsćańskeje zgromaźiny.