Nowe Wiki/Neupetershain. 23. měrca jo była krajna zagronita za nastupnosći Serbow Ulrike Gutheil w Nowych Wikach. To jo źěl jeje rozgronow z tymi komunami, kótarež deje byś nowe w serbskem sedleńskem rumje. We Nowych wikach su dostali wopowěsć, až su w sedleńskem rumje, ale tak glucne njejsu wšykne z tym.

We tamnem głownem wuběrku jo Ulrike Gutheil wó tom informěrowała, kake lěpšyny serbski sedleński rum ma a kak to financielne wurownanje funkcioněrujo. Pśišła jo tam na pśepšosenje głownego wuběrka města. Su byli kritiske głose, ale teke Serbam pśichylone. Jaden jich zastupnikow jo był Günter Pawliš z Lubochowa. Wón jo Casnikoju k wěsći dał, až pó jogo měnjenju jo to była mjeńšyna, kótaraž jo pśeśiwo tomu, ale głosna mjeńšyna z mócnymi słowami. Te pśigłosowarje su skerjej luźe śichych zukow.

Jogo nejwažnjejšy facit jo, až dej se wjele wěcej mjazsobu powědaś. Pśeśiwniki su skerjej wjelgin špatnje informěrowane. A njezwurazniju jano financiělne a zasadne wobmyslenja, ale teke take, źo to dej wjasć. „Buźo našo głowne město skóro Praga?“, su se pšašali.