„Toś ta iniciatiwa šwejsujo nas gromadu“, jo groniła 6. měrca we žylojskej kita „Mato Rizo“ Ludmila Budarjowa. Ta pśedsedarka Serbskego šulskego towaristwa jo z tymi słowami zespominała zmakanje dla wobmyslonych wobgranicowanjow serbskeje wucby. Pśišło jo tam 45 luźi: starjejše, stare starjejše, zastupniki kubłańskich institucijow a źiśi. Jich wšyknych su tam wjadli pšašanja a rozgórjenje dla planowanego nowego póstajenja za serbske šulstwo. Ministarstwo za kubłanje, młoźinu a sport (MBJS) ga co póstajiś minimalnu licbu wót 12 wuknikow za serbsku wucbu. K tomu pśiźo gromaduspóranje wěcej lětnikow.