Žylow/Sielow. Lětosny zapust jo sobotu tyźeń tudy zapustarjam a pśiglědarjam wjelicku radosć napórał. Tu planowanu licbu wót 160 regularnych pórow njejsu derje dostali – to ga by se góźeło k 160. zapustoju! Dla togo su k tym 144 pśipowěźonym póram pśidobyli małe źiśi: 14 měšanych pórikow a gólcowu Rocco a Antona prědku teje smugi. Tak, až su naslědku na tu wucowanu licbu weto hyšći pśišli!
Což pak dawno njejo se wiźeło w Žylowje, to jo była ta wjelicka mań pśiglědari. Wóni su južo pśi sportnišću se śišćali a tłocyli jaden pśi drugem a teke we jsy pśi droze.