Z Gór/Guhrow. Sobotu tyźeń jo 55 pórow – źiśi, młoźina a ženjone – swěśiło zapust a śěgnuło we pśeśěgu pó jsy. Ceło prězy su maršěrowali źiśi, nagromadu sedym pórikow, za nimi pak Lampelojc Gudrun (62) a Gert (64). „To jo za naju wjelgin wósebna cesć“, stej wónej nam groniłej. Wónej stej we swó­jom žywjenju južo telik razow zapustowałej – to njejo zewšym k do­licenju! „Nama se wjelgin spó­doba,tradiciju zapusta woplěwaś a młoźinu k tomu póraś, aby we našych stopach dalej chójźiła. Mej smej zapšawom kśěłej južo łoni wopśestaś. Ale gaž słyšyš zuki muziki a wiźiš žeńske we tej rědnej drastwje, ga sebje kuždy raz groniš: Ně, to njedej byś slědny raz! Mej buźomej stakim tak dłujko sobu gótowaś, ako te nogi budu naju njasć“, stej nam wjasołej wulicowałej. Zapustarje su se pśi dubje zestupali k obligatoriskej zgromadnej fotografiji, kótaruž jo wobstarało Goethojc foto-studio z města.