Lětosa móžomy wšakim wažnym serbskim institucijam w Dolnej Łužycy gratulěrowaś k 25. narodninam abo jubilejoju. Su to wótźělenje Serbskego instituta za dolnoserbske slěźenje, ABC (Arbeitsstelle für sorbische/wendische Bildungsentwicklung Cottbus), Šula za dolnoserbsku serbsku rěc a kulturu, Dolnoserbski telewizijny magacin „Łužyca“, chor „Łužyca“ a nic naslědku Serbska kulturna informacija Lodka. A ta slědna jo teke ta prědna w tom dłujkem rěźe tych jubilarow.
Kradu 6. měrca lěta 1992 jo wóna swóje źurja prědny raz wótcyniła, a to w nowem Serbskem domje, kótaryž běchu Dolne Serby 1991 dostali. Ale kak nejlěpjej na ten jubilej spominaś? W Lodce a w Załožbje za serbski lud, kótarejž Lodka z lěta 1996 pśisłuša, su wó tom pśemyslowali.
Jaden drugi jubilej jo jich pón wjadł k wjelgin dobremu rozsuźenjeju. Wót lěta 1992 ga Lodka wugótujo w Serbskem domje wósebne wustajeńce z ludowym a profesionalnym wuměłstwom (Kunst) – z wobrazami, fotami, keramiku, grafikami a drugim. Kužde lěto styri – to groni, až jo ta prědna w lěśe 2017 rowno ta 100.! Tak stej se dwa gódnej jubilara gromadu namakałej. Kaka gluka! Kaka rědna wěc!