Chóśebuz/Cottbus. Wukniki Dolnoserbskego gymnaziuma su stwórtk tyźeń swěśili zapust. 21 pórow jo śěgnuło z gercymi a někotarymi wucabnikami, juskajucy a spiwajucy, až do wjacora pśez město – wšykno dwanastkarje (až na dwa „młodej pórika“ ze šestego lětnika).
Ceło prězy, ako prědny pórik, stej šłej Šramojc Ronja z Gołbina a Marcel Dehmlow z města, wón z chóžyšćom w ruce. Za Ronju jo to prězyhyśe pśedewšym pśipóznaśe jeje serbskego wugbanja. Rozmjej: Ronja słuša k tym, ako we lětniku lětosnych abiturientow nejlěpjej serbski powědaju. Wóna jo we wugbaśowem serbskem kursu, ma serbskego starego nana a se pilnje angažěrujo we swójej narodnej jsy pśi woplěwanju serbskeje kultury a rěcy. Teke ta serbska drastwa jo jeje: wóna jo ju ku górjejbranju pódarjonu krydnuła, ceło wótnowotki šytu. (Na tom dnju ma nagromadu pěś źowćow swóju samsku drastwu woblaconu, druge maju ju ze šule póžyconu).