Domowina jo srjejź decembera organizěrowała styridnjowsku studijnu ekskursiju do Waliziskeje. Jeje cel: Se wopóznaś z wuspěchami pśi zeźaržanju a rewitalizaciji waliziskeje rěcy a we tom nastupanju wót Walizarjow wuknuś. Na ekskursiji su se wobźělili źaseśo, mjazy drugim pśedsedaŕ Domowiny Dawid Statnik, direktor Załožby za serbski lud Jan Budar a župan slěpjańskeje župy Manfred Hermaš. Dolnołužyskich Serbow stej zastupowałej wědomnostna sobuźěłaśerka Rěcnego centruma Witaj dr. Madlena Norbergowa a referent krajneje zagroniteje za nastupnosći Serbow w Bramborskej Měto Nowak.