Konkretny plan za załoženje nowych wětšych wokrejsow w Bramborskej, kenž jo w oktobrje znaty cyniło bramborske ministarstwo z nutśikowne, jo wubuźił wšuźi mócny protest. Wót lěta 2019 ga dej Bramborska měś jano hyšći źewjeś wokrejsow a nic 14 ako něnto. Wósebnje we wokrejsu Sprjewja/Nysa (SPN) wobaraju se komunalne politikarje, wobydlarje a opozicija pśeśiwo tomu, až dej nastaś w połudnjejšych stronach Bramborskeje wjelgin wjeliki wokrejs z něntejšych tśich wokrejsow SPN, OSL a EE a z města Chóśebuz. We njom buźo raz bydliś wokoło 500.000 luźi, mjazy nimi wětšy źěl tych něźi 20.000 serbskich luźi w Dolnej Łužycy. Ten wokrejs buźo z něźi 5.000 kwadratnymi kilomejtarjami hyšći raz tak wjeliki ako ceła Pósaarska/Saarland ze swójimi 6 wokrejsami. To ma wětšy źěl za njemóžne a teke to, až su za jen naraźili mě „Niederlausitz“. Z tym se zgubijo docełego to tradicionelne pomjenjenje Spreewald/Błota.