Direktor Serbskego instituta (SI) Hauke Bartels jo rozpšawił, až su strukturne reformy instituta pśisamem wobzamknjone. Wón rowno pišo skóńcnu rozpšawu, pótom dej rada Załožby za serbski lud wó tom wobradowaś, lěc su spokojne z rezultatom. Nejwažnjejša změna jo, až institut ma něnto jano dwě wótźěleni: rěcywědu a kulturne wědomnosći. Bartels, kótaryž jo był pjerwjej wjednik chóśebuskego wótźělenja a něnto jo wjednik rěcywědnego wótźělenja, jo gronił, až ta změna njejo k špatnemu dolnoserbskego. Skerjej jo tak, až górnoserbske rěcywědniki su wšake wót togo pśiwzeli, ako w Chóśebuzu źěłaju.