Synagoga w Chóśebuzu jo dostała pśi tej góźbje nowy mobilar: blido za tora, blidko za chanukka (rituelny swěcnik) a gronarski pult. Jaden tych priwatnych dariśelow jo Wieland Eschenburg (nalěwo). Sobu wótekšył jo blido za tora bramborski krajny rabbinaŕ Nachum Presman (napšawo). 
9. nowember jo źeń dopomnjenja na pogromy napśeśiwo Žydam pśed 78 lětami w cełej Nimskej. Pśi tej góźbje jo pśišeł Zwězkowy prezident Joachim Gauck lětosa do Chóśebuza. Tam, źož su 1938 tu synagogu pódpalili, na Karl-Lieb-knechtowej droze pśed Galeriju Kaufhof, jo było dopomnjeńske zarědowanje. Gauck jo połožył wěnk, rowno tak ako Bramborski ministarski prezident Dietmar Woidke a wušy šołta města Chóśebuz Holger Kelch. W radnej licbje su teke druge luźe tam połožyli kwětki. Nachum Presman, krajny rabinaŕ Bramborskeje, jo spiwajucy głosnje bjatował.
Zwězkowy prezident tak ako druge su pótom śicho śěgnuli do chóśebuskeje synagogi na Grodkojskej droze. Ewangelska cerkwja jo tu něgajšnu Grodowu cerkwju 2014 žydojskej wósaźe pśepódała, kótaraž jo tam 2015 swóju synagogu wusweśiła. To jo prědna synagoga w Bramborskej pó wójnje a hyšći ta jadnučka.
