A ako kužde lěto se pšašam: Taki almanach, jo to hyšći moderne dosć za naš cas? Wšuźi su wóni swój publikum zgubili, ale typiske za Serbow jo: My hyšći mamy taki kalendaŕ w knigłowej formje z astrologiskimi informacijami, anekdotami, małkimi tšojeńkami, bildkami a powěsćami – hejnak w 17. stolěśu, gaž su almanachy prědny raz pla šyrokego publikuma woblubowane byli. Hynźi su se dalej wuwijali k publikacijam k jadnej temje ak pšawidłownje wuchadaju, ale pla Serbow? Hyšći hejnak w 17. stolěśu a jadna z nejwoblubowanjejšych publikacijow Ludowego nakładnistwa Domowina!

Zazdaśim zajmujo se how we Łužycy hyšći něchten za zwěsćelowanje wjedra z pomocu astrologije a stolětneje pratyje, lěcrownož tek juž ta „normalna“ wjedrowa powěsć w našom regionje cesto njepśitrjefijo. Nanejmenjej stej tej dwě rubrice zasej pódla: ten „Kněžaŕ lěta“ a wurězki ze stolětneje pratyje. Glěda pópšawem teke raz něchten slědk, lěc jo něco z togo w zachadnem lěśe pśitrjefiło?