Swójim gósćam z drugich źělow Nimskeje abo swěta něco serbskego dariś – to źo wót decembra z filmom „Fastnachtsstrauß und Erntekranz. Wendische Bräuche in der Niederlausitz“. Chóśebuski filmaŕ Donald Saischowa jo ten film zgromadnje z partnarjami w nadawku Załožby za serbski lud producěrował. Wóna jo kśěła w prědnem rěźe měś zasej film, kótaryž wujasnijo a pokažo w rědnych wobrazach serbske nałogi našogo regiona. Premjera toś togo filma buźo samo w kinje a to dwójc na filmowem festiwalu (na 5. boce Casnika namakaśo tej termina).

Filmarje su glědali, až njejo to folklora, což pokazuju, ale napšawdu naše nałogi. Pśisamem cełe lěto jo team filmarjow ducy był we našych jsach a na zarědowanjach: nowolětki, camprowanje, zapust, jańske rejtowanje, kokot a Janšojski Bog jo ten 52 minutow dłujki film zapópadnuł. Wósebne śěžyšćo su jatšy z kopicu našych nałogow. Za wulicowanje wšogo su namakali rědny ramik na bórkojskem dwórje, źož jo cas napšawdu stojecy wóstał.