Lubowarje a pśijaśele filma južo dawno na to cakaju a se wjasele, co buźo wót 8. do 13. nowembra w Chóśebuzu. Na tych 6 dnjach se wugótujo južo 26. raz zasobu Chóśebuski festiwal pódzajtšnoeuropskego filma, a to w 8 kinach a dalšnych městnach. Ten jo wósebnje pśez to tak woblubowany, dokulaž se how pokažu filmy we młogich žanrach, ako howacej bóžko k wiźenjeju njejsu w kinach abo w telewiziji. Rowno to jo pśiwabiło w slědnych lětach pśecej wokoło 20.000 woglědari, a teke lětosa lice Bernd Budaŕ ako programowy direktor a wše druge organizatory togo wjelikego filmowego swěźenja z takim wjelikim publikumom.