Taki swěźeń njejo hyšći w Zakrjejcu (Wadelsdorf) dało. Wobydlarje su swěśili na dwóju: wejsny swěźeń a jubilej 25 lět tudejšnego zwězka wobsednikarjow góle Grodk-pódzajtšo (FBG).

Był jo burski mark, gólnikarska technika jo była wiźeś, teke Bramborska šula za wobsednikarje góle jo se pśedstajiła. Woglědarje su se mógli z kutšu do góle pśejěś. Ekspertka Undine Janetzky z Běłeje jo wjadła ekskursije k źiwym zelam. Gólnikarje su rozpokazowali techniku: wjeliku piłu, rězanje drjewa k palenju a rězanje bałkow a delow. Firma z Drěžnice jo pušćała wjeliki topoł, ak jo stojał na swěźeńskem měsće.