Chóśebuz/Cottbus. Firma Vattenfall jo skóńcnje pśepódała łužyske milinarnje nowemu wobsejźarjeju. Na medijowej konferency jo se slědnu wałtoru pśedstajiło to nowe energijowe pśedewześe LEAG. Pód kšywom firmy stej AG za łužyske jamy a AG za łužyske milinarnje. Inwestora teje noweje firmy stej ku 50 % čechojska firma za energijowe zastaranje EPH a ku 50 % čechojski financny słužbywugbaŕ PPF. Pśedsedaŕ jo Helmar Rendez, do togo financny pśedstojaŕ wót Vattenfalla we Łužycy.
To wjelike pšašanje něnto jo: kak pójźo dalej we Łužycy z jamami a milinarnjami? Ale: žedne wótegrona njejsu pśišli. LEAG jo groniła, až firma jo akle zachopiła z rozgronami z EPH. Rozsuźenja su wótcakowaś w nalěśu lěta 2017. Dokradny termin za to njejo jasny. Pśistajone firmy njekśě spušćiś zawodowych pśicynow dla až do lěta 2020. Wše něntejšne źěłaśerje mógu wóstaś.