Znata młoda Serbowka a Domowinarka z Gór w župje Dolna Łužyca jo se wóženiła 19. awgusta – ga Jennifer Dünnbierojc. Wóna jo pśedsedarka noweje Domowinskeje kupki na Górach, ako ma něnto južo wokoło 90 cłonkow, a jadna ze 5 zastupnikow Dolneje Łužyce we Zwězkowem pśedsedarstwje Domowiny. Rowno tak organizěrujo južo žedne lěta to zabijanje kokota na Górach.
Hyšći lětosa buźo wóna zakóńcyś swój studium na uniwersiśe w Lipsku a pón buźo wóna serbska ceptarka. Nejpjerwjej na šuli we Brjazynje a w jadnej měsćańskej šuli. Pótom jo pśedwiźony referendariat na Dolnoserbskem gymnaziumje, a jolic se wšykno raźijo, buźo tam teke wucyś dolnoserbsku rěc, což jo jeje wjelike žycenje.
Tśi dny su swěśili swajźbu. Stwórtk wjacor, 18. awgusta, jo pśichwatało 100 a wěcej luźi na tradicionelnu pśiswajźbu (Polterabend) na górjańskem sportnišću. Mjazy nimi su byli młode luźe z Gór a z Wjerbna, kótarež su wili za swajźbu tu girlandu. Teke ze Strjažowa, źož jo jeje cłowjek Tilo doma, su pśichwatali.